July 28, 2023 
काठमाडौंः उपप्रधानमन्त्री तथा रक्षामन्त्री पूर्णबहादुर खड्काले गौचरणस्थित सैनिक हवाई सेवाअन्तर्गत मध्य एयर वेशको निरीक्षण भ्रमण गर्नुभएको छ । उहाँलाई मध्य एयर वेशमा प्रधान सेनापति प्रभुराम शर्माले स्वागत गर्नुभएको थियो ।
उपप्रधानमन्त्री तथा रक्षा मन्त्रीलाई सैनिक हवाई सेवा प्रमुख, पाइलट उपरथी आशिष नरसिंह राणाले सैनिक हवाई सेवाको वस्तुस्थिति लगायत सैनिक हवाई सेवाका विविध गतिविधिबारे जानकारी गराउनुभयो ।
सोही अवसरमा रक्षामन्त्री खड्काले मध्य एयर वेशमा रहेका सैनिक हवाई साधन तथा अन्य महत्त्वपूर्ण उपकरणको अवलोकन गर्नुभयो । उहाँले सैनिक हवाई सेवाबाट विपद् उद्धार, विकास निर्माण लगायतका क्षेत्रमा सम्पादन भएका कार्यको उच्च प्रशंसा गर्नुहुँदै आगामी दिनमा उच्च मनोबलका साथ कार्य गर्न निर्देशन समेत दिनुभयो ।
भ्रमणकै क्रममा उपप्रधानमन्त्री तथा रक्षा मन्त्रीको अध्यक्षतामा नेपाली सैनिक विमान चार्टर उडान विकास समितिको २५ औँ बैठक समेत सम्पन्न भएको सैनिक जनसम्पर्क तथा सूचना निर्देशनालयले जनाएको छ ।
त्यस अवसरमा रक्षा सचिव किरणराज शर्मा, बलाधिकृत रथी सरोज प्रताप राणा, उच्च पदस्थ पदाधिकारी लगायत सैनिक हवाई सेवाका अधिकृतको सहभागिता थियो ।
September 30, 2023 
